У ліпені 2014 г. на тэрыторыі Бешанковіцкага р-на была праведзена стацыянарная этнаграфічная экспедыцыя Полацкага дзяржаўнага ўніверсітэта сіламі выкладчыкаў і студэнтаў гісторыка-філалагічнага факультэта (кіраўнік У.Я. Аўсейчык).

Геаграфія экспедыцыі

Палявымі даследаваннямі былі ахоплены наступныя населеныя пункты: вв. Астроўна, Бардашы, Беркава, Будзілава, Вяжышча, Вялікія Паўлавічы, Вялікія Галыні, Гарадзец, Гняздзілава, Доброва, Дышкова, Жауры, Забелле, Задарожжа, Засенкі, Засор’е, Застарынне, Ліхошына, Малыя Паўлавічы, Падакі, Панкратава, Светагорава, Сініцы, Сіняны, Соржыца, Холм, Чарнагосце.

Прадметная поле даследаванняў і вынікі

Пад час правядзення экспедыцыі быў зафіксаваны значны аб’ём матэрыялаў па пахавальна-памінальных традыцыях, каляндарных абрадах, народнай медыцыне і знахарстве, інфармацыя па сакральнай і легендарнай геаграфіі (культавая крыніца і камень-следавік ля в. Астроўна, Святое возера ля в. Падакі), тапанімічныя паданні, звесткі пра міфалагічныя ўяўленні і вераванні, этнічныя групы і традыцыйную матэрыяльную культуру  раёна, а таксама ўспаміны мясцовага насельніцтва пра перыяд нацыскай акупацыі і партызанскі рух 1941-1944 гг.

Маршрутная экспедыцыя, жнівень 2014 г., сумесна з цэнтрам іудаікі “Сэфер”

Праведзена на тэрыторыі Лепельскага р-на. Даследаваннямі былі ахоплены наступныя вёскі: Бароўка, Бяседы, Верабкі, Вілы, Вял. Поўсвіж, Дворышча, Казлы, Свядзіца, Слабодка, Чарнаручча, Юшкі. Зафіксаваны значны матэрыял па гісторыі і культуры яўрэйскай этнічнай групы на Лепельшчыне, інфармацыя па сакральнай і легендарнай геаграфіі рэгіёна (культавыя крыніцы ля вв. Бароўка і Бяседы, Святы камень ля в. Вял. Поўсвіж, паданні пра азёры Вял. і Мал. Гагол), пахавальна-памінальнай традыцыі, народнай медыцыне і знахарстве, вуснай гісторыі ХХ ст.