24 кастрычніка ў Полацкім дзяржаўным універсітэце імя Еўфрасінні Полацкай адбыўся Дзень адкрытых дзвярэй, сумешчаны з кірмашом мэтавай падрыхтоўкі. Каля 900 наведвальнікаў пазнаёміліся з факультэтамі, даведаліся пра ўмовы паступлення, а таксама пра дадатковыя праграмы для прафесійнага і асобаснага развіцця.
Творческий номер студентов
На ўрачыстым адкрыцці Дня адкрытых дзвярэй абітурыентаў прывітаў рэктар Полацкага ўніверсітэта Юрый Яцэнтавіч Раманоўскі.
На брыфінгу, прысвечаным асаблівасцям уступнай кампаніі 2027 года, рэктар нагадаў пра 5 ільготных траекторый паступлення, якія дазваляюць стаць студэнтам без сертыфікатаў ЦТ і ЦЭ:
- атрымаць дыплом I, II ці III ступені на шматпрофільнай універсітэцкай алімпіядзе
- атрымаць накіраванне на мэтавы набор
- атрымаць дыплом I, II ці III ступені на абласным этапе Рэспубліканскай алімпіяды школьнікаў
- прайсці навучанне ў класе профільнай накіраванасці: інжынерным, педагагічным, спартыўна-педагагічным, ваенна-патрыятычным класе або групе
- атрымаць атэстат асобага ўзору і быць узнагароджаным залатым ці сярэбраным медалём
Абітурыенты (фота 1) Юрый Яцэнтавіч Раманоўскі (фота 2)
Мерапрыемства працягнулася інфармацыйнымі сесіямі з афіцыйнымі прадстаўнікамі факультэтаў. Дэканы расказалі пра асаблівасці вучэбнага працэсу і магчымасці, якія дае кожная спецыяльнасць, у тым ліку пра працаўладкаванне выпускнікоў.
Каб спрасціць працэс паступлення, у Полацкім універсітэце дзейнічае аўтаматызаваная сістэма залічэння. Азнаёміцца з яе працай і даведацца пра прахадныя балы мінулых гадоў можна ў адпаведных раздзелах сайта для абітурыентаў. Акрамя таго, на базе ўніверсітэта арганізаваны падрыхтоўчыя курсы да цэнтралізаванага экзамену, цэнтралізаванага тэставання і ўступных выпрабаванняў 2027 года. Падрабязная інфармацыя і кантакты даступныя па спасылцы.
Пляцоўка кафедры архітэктуры і дызайну
У межах Дня адкрытых дзвярэй адбыўся кірмаш мэтавай падрыхтоўкі. Прадстаўнікі арганізацый – заказчыкаў кадраў расказалі абітурыентам пра запатрабаваныя спецыяльнасці, перавагі мэтавага навучання і магчымасці кар’ернага росту пасля заканчэння ўніверсітэта. Сярод удзельнікаў – прадстаўнікі ААТ «Нафтан», УП «Віцебскаблводаканал», УП «Віцебскаблгаз», Віцебскай мытні, Упраўлення Следчага камітэта па Віцебскай вобласці, а таксама прадпрыемстваў і ўстаноў Полацка і Наваполацка.
Кірмаш мэтавай падрыхтоўкі
На інтэрактыўных пляцоўках школьнікі пазнаёміліся з рознымі спецыяльнасцямі праз практычныя заданні, гульні і майстар-класы. Старшакласнікі зазірнулі ў археалагічнае мінулае на міні-выставе, паспрабавалі сябе ў псіхалагічных і педагагічных актыўнасцях, а таксама праверылі веды замежнай літаратуры.
Інтэрактыўныя пляцоўкі гуманітарнага факультэта
На пляцоўках інжынерна-будаўнічага факультэта школьнікі назіралі за невялікімі доследамі па ачыстцы вады. У будучыні, стаўшы студэнтамі Полацкага ўніверсітэта, яны змогуць праводзіць паўнавартасныя даследаванні ў лабараторыях Цэнтра кампетэнцый «Будаўніцтва і інжынерныя сеткі». На пляцоўках механіка-тэхналагічнага факультэта абітурыенты змаглі адчуць сябе даследчыкамі, аўтамабілістамі і хімікамі.
Пляцоўка механіка-тэхналагічнага факультэта
Будучым эканамістам і юрыстам прапанавалі паспрабаваць сябе ў эканамічных расследаваннях і аналізе даных, агледзець месца здарэння, папрацаваць з фотаробатам і даведацца, як уладкавана зона мытнага кантролю.
Пляцоўкі юрыдычнага факультэта
На пляцоўках, прысвечаных лічбавым тэхналогіям і электроніцы, школьнікі пазнаёміліся з асновамі кадавання, камп’ютарных сетак, працы з данымі і нейрасеткамі, а таксама са светам чыпаў, гаджэтаў і робататэхнікі. Фармат пляцовак дазволіў не толькі атрымаць новую інфармацыю, але і пагутарыць з выкладчыкамі і студэнтамі, задаць пытанні і зразумець, якія кірункі выклікаюць найбольшую цікавасць.
Пляцоўкі факультэта інфармацыйных тэхналогій і факультэта камп’ютарных навук і электронікі
На Дні адкрытых дзвярэй старшакласнікі даведаліся пра магчымасці для дадатковай адукацыі і прафесійнага развіцця, якія прапануе Полацкі ўніверсітэт. Напрыклад, у Цэнтры вывучэння замежных моў можна з нуля вывучыць англійскую, нямецкую, французскую ці кітайскую мову. Заняткі праходзяць у зручны час – індывідуальна або ў групах рознага памеру – на пляцоўках у Полацку і Наваполацку.
Пра развіццё прадпрымальніцкіх навыкаў расказалі прадстаўнікі Цэнтра стартапаў і прадпрымальніцкіх ініцыятыў «Startup Live». Там студэнтам дапамагаюць увасабляць бізнес-ідэі і знаёмяць іх з асновамі распрацоўкі бізнес-плана, фарміравання іміджу праекта, B2B-продажаў, падаткаабкладання, маркетынгу і юрыдычнага суправаджэння.
Яшчэ адна магчымасць – навучанне на ваеннай кафедры: яно сумяшчаецца з атрыманнем любой абранай грамадзянскай спецыяльнасці, а пасля заканчэння курса прысвойваецца першае афіцэрскае званне – «лейтэнант запасу».
Пляцоўка ваеннай кафедры
Абітурыенты падзяліліся ўражаннямі пра Дзень адкрытых дзвярэй і Полацкі ўніверсітэт:
Крысціна Протас: «Я хачу паступіць на спецыяльнасць «Штучны інтэлект», таму што гэта новы кірунак, які, на мой погляд, будзе запатрабаваны ў будучыні. Да таго ж ён мне вельмі цікавы».
Крысціна Протас
Сафія Тарохава: «Я абрала для сябе спецыяльнасць «Электронная эканоміка», таму што яна мне цікавая і блізкая. Мае бацькі працуюць у гэтай сферы. Сёння нам падрабязна расказалі пра факультэты і спецыяльнасці. Цяпер мы можам быць упэўненыя ў сваім выбары».
Сафія Тарохава
Міхаіл Мяцеліца: «Я прыехаў з Глыбокага, дзе вучуся ў фізіка-матэматычным класе. Мне тут усё падабаецца. Усе добразычлівыя і адкрытыя, усё расказваюць. Разглядаю механіка-тэхналагічны факультэт, бо мне цікавыя тэхналогіі. Тэхніка захапляе мяне з дзяцінства».
