Дзень Перамогі 2026

На мемарыяльным комплексе «Прарыў» ва Ушацкім раёне прайшла абласная патрыятычная акцыя «Прарыў Перамогі». Тут адбыўся мітынг «Подзвігу народа жыць у вяках», прымеркаваны да 82-х угодкаў прарыву партызанамі Полацка-Лепельскай зоны варожай блакады. Удзельнікі ўшанавалі памяць абаронцаў Радзімы хвілінай маўчання і ўсклалі кветкі.

Прадстаўнікі Полацкага ўніверсітэта падрыхтавалі ўласную інтэрактыўную пляцоўку, экспазіцыя якой расказала пра ўклад народа ў Вялікую Перамогу. Атмасферу свята дапоўнілі выступленні ўдзельнікаў конкурсу «Майскі вецер» і ўзорна-паказальнага аркестра Узброеных сіл Рэспублікі Беларусь.

Увага да гістарычнай спадчыны спалучаецца з падтрымкай ветэранаў. Штогадовая акцыя «Павіншуем ветэранаў разам!» дазваляе студэнтам і адміністрацыі ўніверсітэта асабіста наведаць удзельнікаў вайны і былых вязняў канцлагераў. Сёлета цёплы прыём гасцям аказала Ніна Пятроўна Салцэвіч, з якой прадстаўнікі ўніверсітэта падзяліліся радасцю надыходзячага свята.

Юрый Яцэнтавіч Раманоўскі, рэктар Полацкага ўніверсітэта: «У вачах застываюць слёзы, але ўсмешка на твары, калі бачыш людзей, якія прайшлі праз нягоды, голад і цяжкасці вайны. Малалетнія вязні фашысцкіх канцлагераў – гэта маленькія, але ўстойлівыя людзі, якія гераічна выстаялі і пераадолелі ўсе нягоды ваенных гадоў. Сёння мы павінны памятаць і перадаваць маладому пакаленню праўдзівую гісторыю з першых вуснаў, бо відавочцаў з кожным годам становіцца, нажаль, усё менш і менш».

Памяць пра падзеі тых гадоў знаходзіць адлюстраванне і ў культуры. Студэнты Полацкага ўніверсітэта наведалі адкрыццё выставачнага праекта Мода Перамогі ў музеі гісторыі і культуры Наваполацка. Экспазіцыя знаёміць наведвальнікаў з прадметамі часоў Вялікай Айчыннай вайны, і праз адзенне сярэдзіны XX стагоддзя расказвае пра сімвалы пачатку мірнага жыцця.

Святочныя мерапрыемствы ахапілі і спартыўнае жыццё рэгіёну. На галоўнай вуліцы Наваполацка адбылася 60-я гарадская лёгкаатлетычная эстафета, якая аб'яднала 62 каманды прадпрыемстваў і навучальных устаноў. Зборная Полацкага ўніверсітэта паказала выдатныя вынікі: жаночая каманда атрымала перамогу ў першай групе і заваявала срэбра ў абсалютным заліку, а мужчынская зборная стала другой у сваёй групе.

Напярэдадні свята ў Наваполацку адкрыўся Цэнтр ваенна-патрыятычнага выхавання і фізічнай культуры дзяцей і моладзі. Рэктар Полацкага ўніверсітэта Юрый Яцэнтавіч Раманоўскі удастоены падзякі Наваполацкага гарадскога выканаўчага камітэта за важкі ўклад у стварэнне цэнтра.

У рамках цырымоніі адкрыцця байцы студэнцкага атрада «Эйфарыя» імя двойчы Героя Савецкага Саюза Канстанціна Канстанцінавіча Ракасоўскага прадставілі настольную гульню «Цаліна», а старшы выкладчык ваеннай кафедры Дзмітрый Васільевіч Рымко прадэманстраваў аўдыторыю для падрыхтоўкі аператараў БПЛА.

У горадзе прайшоў V юбілейны адкрыты гарадскі конкурс чытальнікаў «Вайны пераможны радок», дзе ўдзельнікі дэкламавалі творы беларускіх аўтараў аб жаночым вобразе ў ваеннай паэзіі. Студэнты студыі вядучых «Канферанс» Полацкага ўніверсітэта прадэманстравалі высокі ўзровень прамоўніцкага майстэрства: Мікіта Карла заняў першае месца, а Максім Цыбульскі – другое.

У мікрараёне Баравуха адбылося адкрыццё памятнага знака на брацкай магіле савецкіх воінаў і партызан. Удзельнікі ўсклалі кветкі да падножжа мемарыяла і ўшанавалі хвілінай маўчання памяць савецкіх воінаў і партызан, якія мужна змагаліся за Радзіму. Мітынг у памяць аб героях Вялікай Айчыннай вайны прайшоў і ля помніка падпольшчыцы Ліліі Касцецкай.

У сценах Полацкага ўніверсітэта прайшоў святочны канцэрт «Скрозь гады вайны да траўня Перамогі». Зала ператварылася ў жывы летапіс, які адлюстраваў падзеі ад фатальнага чэрвеня 1941 года да светлага Дня Перамогі. Студэнты падрыхтавалі тэатральныя пастаноўкі і творчыя нумары, а таксама выканалі песні ваенных гадоў. Напрыканцы канцэрта ўсе ўдзельнікі і гледачы выканалі легендарную кампазіцыю Дзень Перамогі.

9 траўня адбылося шэсце «Яны змагаліся за Радзіму» у рамках рэспубліканскай акцыі «Беларусь памятае!». Выкладчыкі і студэнты Полацкага ўніверсітэта разам з тысячамі навапалачан прайшлі па вуліцы Маладзёжнай ад помніка «Расколатая зорка» да плошчы Будаўнікоў, аддаючы даніну павагі героям. Прадстаўнікі ўніверсітэта таксама далучыліся да Агульнанацыянальнай хвіліны маўчання.

Андрэй Бараўкоў, камандзір студэнцкага будаўнічага атрада «Эўрыка» імя Героя Савецкага Саюза Віктара Іванавіча Яронькі: «Для мяне і маёй сям'і 9 траўня – гэта свята, якое тычыцца кожнага з нас, бо вайна не абыйшла нашым сям'ем бокам. Усе мае прабабулі і прадзядулі – удзельнікі Вялікай Айчыннай вайны. Кожны год нашая сям'я выходзіць на шэсце. Ужо 10 гадоў мы ідзем, каб аддаць даніну памяці не толькі сваім родным, але і ўсім, хто ваяваў за тое, каб мы жылі пад мірным небам».

На плошчы Будаўнікоў свята працягнулася канцэртам «Дарогамі памяці», у якім творчыя калектывы Полацкага ўніверсітэта і гарадскія артысты прапанавалі гледачам музычныя і танцавальныя нумары, прысвечаныя подзвігу народа.

Паралельна ў Парку культуры і адпачынку разгарнулася інтэрактыўная праграма «Вясна 45-га: Партызанская вёска». Супрацоўнікі і студэнты Полацкага ўніверсітэта актыўна ўдзельнічалі ў арганізацыі тэматычнай пляцоўкі: яны аднавілі атмасферу ваеннага часу з палявой кухняй, выставай зброі і побыту партызан. Госці прымяралі форму, фатаграфаваліся на фоне дэкарацый, а таксама бралі ўдзел у інтэрактыўных гульнях «Маршрут па картах» і «Выдатны стрэлак», збіралі франтавы ліст і спявалі песні пад акампанемент.

Завяршыўся святочны дзень вячэрнім канцэртам «Мы за мір», дзе выступілі заслужаная артыстка Рэспублікі Беларусь Ірына Дарафеева і ўдзельнік праекта «Зорны шлях» Кірыл Арцёменка. Яркім фіналам урачыстасцяў стаў святочны салют, які азарыў неба ў гонар Дня Перамогі.