Дзень ведаў 2026

На урачыстых сходах па факультэтах учорашнія абітурыенты ўпершыню адчулі сябе паўнапраўнымі членамі універсітэцкай супольнасці. Дэканы асабіста ўручылі першакурснікам запаветныя студэнцкія білеты, а вось звыклыя папяровыя залікоўкі адышлі ў мінулае, уступіўшы месца лічбаваму фармату. Інавацыі – гэта тое, што адрознівае сучасны ўніверсітэт, і нашы студэнты асвойваюць іх з першага дня.

Самай яскравай часткай дня стала «Прысвячэнне ў студэнты». У канцэртнай зале першакурснікаў прывітаў рэктар Полацкага ўніверсітэта Юрый Яцэнтавіч Раманоўскі: «Універсітэт дае найшырэйшыя магчымасці для таго, каб вы змаглі сябе знайсці ў творчасці, спорце, вучобе, навуцы. Абавязкова скарыстайцеся імі: запісвайцеся ў спартыўныя секцыі, танцавальныя, вакальныя студыі або студыю вядучых «Канферанс». Станавіцеся байцамі студэнцкіх атрадаў, спрабуйце свае сілы ў навуцы і, вядома, не забывайце пра вучэбныя заняткі. Выкарыстоўвайце кожную лекцыю не толькі для атрымання ведаў, але і для трэніроўкі інтэлекту, фарміравання крытычнага і крэатыўнага мыслення. Імкнецеся да таго, каб не баяцца брацца за самыя складаныя задачы – нават тыя, з якімі пакуль не спраўляецца штучны інтэлект.

Я ўпэўнены, што ў вас усё атрымаецца. Каманда старшакурснікаў, якая будзе суправаджаць вас на гэтым шляху, а таксама нашыя выкладчыкі і супрацоўнікі заўсёды дапамогуць вам выявіць і рэалізаваць ваш патэнцыял. У добры шлях!»

На сцэне прайшла традыцыйная цырымонія: рэктар уручыў першакурснікам сімвалічны Ключ ведаў, а каб энергія і імкненне да адкрыццяў не згасалі на працягу ўсіх гадоў навучання, старшакурснік перадаў новым студэнтам Агонь ведаў.

Першакурснікі далі клятву, абяцаючы быць адданымі свайму ўніверсітэту, імкнуцца да ведаў і любіць Беларусь. Цырымонія завяршылася выкананнем гімну ўсіх студэнтаў.

Андрэй Уладзіміравіч Адзіночкін, намеснік старшыні Наваполацкага гарадскога выканаўчага камітэта: «Наш універсітэт – гэта вялікі шматнацыянальны калектыў. У ходзе навучання вы пабудуеце найважнейшыя сувязі. Сёння тут сядзяць, магчыма, будучыя супрацоўнікі Міністэрства замежных спраў, кіраўнікі найбуйнейшых нафтаперапрацоўчых заводаў – не толькі ў нашай краіне, але і ў Расійскай Федэрацыі, і ў іншых краінах. Тут будучыя знакамітыя юрысты і дыпламаты. Паверце, гэта вельмi важна. Апроч ведаў і прафесійных навыкаў, якія вам дадуць нашы выкладчыкі найвышэйшага ўзроўню, вы здабудзеце галоўнае – студэнцкае брацтва, якое згуртуе вас з першых дзён.

Звярніце ўвагу на Наваполацк. Гэта цікавы, крэатыўны і малады горад. Дарэчы, горад з самай высокай заработнай платай у Віцебскай вобласці. І калі ў вашым сэрцы нешта ёкне, і вы зразумееце: «Я закахаўся ў Наваполацк!», – заставайцеся тут. Будуйце жыллё, стварайце сем'і, працуйце на карысць нашай роднай Беларусі і гораду, які стаў амаль родным. Мы будзем рады бачыць вас у нашай наваполацкай сям'і ўжо ў якасці высакакласных спецыялістаў пасля навучання ў нашым універсітэце.

Жадаю вам поспехаў! Няхай усё задуманае атрымліваецца. Вы дасягнулі мэты – паступілі ва ўніверсітэт. Цяпер стаўце новую: атрымаць прафесію і стаць сапраўдным прафесіяналам сваёй справы. У добры шлях!»

Атмасферу свята стварылі творчыя калектывы. На сцэне выступілі ўдзельнікі студый сучаснага танца «SJ Crew» і «ToryDance», салісты вакальных студый «Настроение» і «Inventa», а таксама байцы студэнцкіх атрадаў Полацкага ўніверсітэта.

Дзень ведаў – гэты толькі пачатак. Наперадзе ў першакурснікаў насычаны «Тыдзень ведаў», які дапаможа ім лёгка адаптавацца да студэнцкага жыцця. Маладыя людзі пройдуць цырымонію «Рэктарскі ўваход», пазнаёмяцца ва ўніверсітэцкімі службамі і студэнцкімі аб'яднаннямі, цалкам увайдуць у структуру навучальнай установы.