14 лютага 2019 года на полацкай пляцоўцы ўніверсітэта адбылося ўрачыстае адкрыццё свята, якое, безумоўна, стане традыцыйным і кожны год будзе збіраць не толькі студэнтаў, супрацаўнікоў і адміністрацыю навучальнай установы, але і жыхароў і гасцей Полацка, Наваполацка – «Фэст за каханне».
Апошнія таксама атрымалі магчымасць адчуць атмасферу рамантыкі і пазітыву, бо фэст-пляцоўка працавала і ў вечары, і ў суботні дзень. За гэты час ва ўнутраным дворыку калегіума пабывала каля 100 наведвальнікаў: моладзь, сем’і з дзецьмі, людзі сталага ўзросту.
Дзеля таго, каб госці маглі бавіць час цікава і прыемна, было падрыхтавана мноства цудоўных магчымасцяў. Усе жадаючыя рабілі прыгожыя здымкі ў фотазоне, арыгінальныя сэлфі пад алеяй сардэц, каля літар кахання і на лаўцы закаханых, а таксама пакідалі словы пра пачуцці да сваіх каханых на сцяне прызнанняў.
У фае ўдзельнікаў свята чакаў фэст-пачастунак – кожнаму госцю прапанавалі духмяны капучына, а таксама працавала рамантык-кафэ, дзе можна было з’есці смачнае пірожнае ці шакаладку.
Побач размясцілася прэзент-зона, дзе кожны госць атрымаў асабістае прадказанне і падарунак, а ў канцэртнай зале быў арганізаваны міні-кінатэатр.
Дзеля таго каб жыхары і госці двух гарадоў атрымалі магчымаць наведаць святочную пляцоўку ўніверсітэта, працавала каманда турцэнтра Полацкага дзяржаўнага ўніверсітэта.
Універсітэцкі фэст усіх закаханых: адзін у аднаго, у сваю сям’ю, у родную Беларусь, у цэлы свет і ў жыццё, сапраўды адбыўся і прынёс добры настрой удзельнікам і арганізатарам.
М.У. Янкоўская, сектар КДД АВРМ