12 чэрвеня ў Полацкім дзяржаўным універсітэце імя Еўфрасінні Полацкай адбыўся круглы стол «У горадзе маім – мой лёс», прысвечаны святкаванню 67-годдзя горада Наваполацка. Галоўным госцем мерапрыемства стаў член Беларускага саюза мастакоў, Ганаровы жыхар горада Наваполацка, старшы выкладчык кафедры архітэктуры і дызайну Віктар Рыгоравіч Лук'яненка.
Віктар Рыгоравіч Лук'яненка
Гісторыю горада ствараюць яго жыхары – таленавітыя, творчыя, ідэйныя і неабыякавыя да ягонага лёсу. Віктар Рыгоравіч Лук'яненка – выдатны мастак, чыё імя трывала звязана з культурным і мастацкім жыццём Наваполацка. Яго творчая дзейнасць пакінула заўважны след у гісторыі горада, а работы натхняюць і радуюць жыхароў.
Удзельнікі круглага стала «У горадзе маім – мой лёс»
Ірына Уладзіміраўна Бурая, прарэктар па навуковай працы Полацкага ўніверсітэта: «Віктар Рыгоравіч – гэта нездарма гонар нашага ўніверсітэта. Гэта, безумоўна, прафесіянал найвышэйшага ўзроўню як у геральдыцы, так і ў сваёй творчай дзейнасці. Чалавек, які валодае, я б сказала, абсалютным, вельмі тонкім густам, своеасаблівым і філасофскім стаўленнем да жыцця.
Зносіны з такім чалавекам заўсёды ўзбагачае. Няважна, пра што ідзе гаворка – абмеркаванне падзей ва ўніверсітэце, новыя працы студэнтаў ці іх творчыя поспехі – гэта заўсёды прыносіць задавальненне для душы, сэрца і розуму. Упэўнена, што ўсе прысутныя даведаюцца нешта новае, адкрыюць новую грань яго асобы.
Усім гасцям жадаю атрымаць вялікае задавальненне ад гэтай сустрэчы, а Віктару Рыгоравічу моцнага здароўя, аптымізму і доўгіх гадоў жыцця!»
Ірына Уладзіміраўна Бурая
Віктар Рыгоравіч з'яўляецца аўтарам геральдычных сімвалаў – герба і сцяга Наваполацка. Стылізаваная выява гарлачыка белай (Nymphaéa álba), якая ў славянскай традыцыі вядомая як адолень-трава – абярэг і сімвал абароны, заняла дастойнае месца сярод гарадскіх гербаў Рэспублікі Беларусь. Бачная прастата і сімвалічная ёмістасць герба – вынік трохгадовых намаганняў у перыяд з 1999 па 2002 год, а таксама творчых пошукаў Віктара Рыгоравіча, якія ўвасобіліся ў сімвал і дэвіз герба Свет і росквіт. Гэта тое, што звязала паміж сабой XX і XXI стагоддзе, гэтае вечнае імкненне беларускага народа і чалавецтва жыць годна на нашай планеце.
Аўтарскі варыянт эталона герба і флага г. Наваполацка
Асобны раздзел у творчай біяграфіі знакамітага мастака займае праца ў Полацкім дзяржаўным універсітэце імя Еўфрасінні Полацкай. «Універсітэцкі гадзіннік», «Універсітэцкая студня», «Малюначая галерэя ва ўнутраным дворыку Полацкага калегіума», «Рэканструкцыя праекта Габрыэля Грубера – Механічная галава», «Галерэя рэктараў Полацкага ўніверсітэта», «Зала паседжанняў Рады Полацкага ўніверсітэта ў аўдыторыі XVIII стагоддзя», інсталяцыя «ГіПар» – праекты Віктара Рыгоравіча Лук'яненка.
Універсітэцкі гадзіннік (фота 1) Механічная галава (фота 2) Адноўленая студня XVIII ст. (фота 3)
У Геральдычным савеце пры Прэзідэнце Рэспублікі Беларусь зацверджаны дзяржаўныя ўзнагароды, распрацаваныя Віктарам Рыгоравічам, – нагрудны памятны знак «За ўклад у патрыятычнае выхаванне моладзі», «Нагрудны знак УА ПДУ», Ганаровы нагрудны знак «За заслугі. неацэнную дапамогу ў фарміраванні архітэктурна-мастацкай канцэпцыі мемарыяльнага комплексу «Поле ратнай славы» у Полацкім раёне, праект якога быў зацверджаны асабіста Прэзідэнтам Рэспублікі Беларусь, што пацвярджае высокі ўзровень даверу да яго прафесіяналізму і бачання.
Узнагароды Полацкага дзяржаўнага ўніверсітэта імя Еўфрасінні Полацкай
На сустрэчы за круглым сталом Віктар Рыгоравіч расказаў пра сваё творчае і прафесійнае станаўленне, раскрыў тонкасці стварэння геральдыкі Наваполацка і падзяліўся поглядамі на творчасць.
