Міжнародная прамысловая выстава «ІНАПРОМ. Беларусь»

«ІНАПРОМ» – гэта сумесная беларуска-расійская выстава, на якой прадстаўлены дасягненні Саюзнай дзяржавы. У гэтым годзе падзея ўпершыню праходзіць у Мінску, аб'ядноўваючы вядучыя прамысловыя кампаніі і дэлегацыі краін ЕАЭС, СНД і іншых дзяржаў. Усяго ў экспазіцыі ўдзельнічаюць звыш 510 кампаній, уключаючы больш як 290 прадстаўнікоў з 23 рэгіёнаў Расіі, звыш 190 беларускіх прадпрыемстваў і больш як 30 замежных кампаній з Казахстана, Кыргызстана і Узбекістана, прадстаўленых у рамках нацыянальных экспазіцый.

У першы дзень выставу «ІНАПРОМ. Беларусь» наведаў Аляксандр Міхайлавіч Субоцін, Старшыня Віцебскага абласнога выканаўчага камітэта. Аляксандр Міхайлавіч прыняў удзел у рабоце круглага стала «Міжнароднае супрацоўніцтва ў галіне прамысловых інавацый – дыялог візаві». Удзельнікі абмеркавалі спосабы развіцця прамыслова-эканамічнага і сацыяльна-культурнага супрацоўніцтва Беларусі і Расіі, для якога неабходна прамое ўзаемадзеянне рэгіёнаў дзвюх краін.

На выставе распрацоўкі навукоўцаў Полацкага дзяржаўнага ўніверсітэта імя Еўфрасінні Полацкай прэзентуе старшы выкладчык кафедры тэхналогіі і абсталявання перапрацоўкі нафты і газу Павел Фёдаравіч Грышын. На стэндзе прадстаўлены натурныя ўзоры:

• Ахоўны воск, распрацаваны ў Полацкім універсітэце, выкарыстоўваецца ў гумавых сумесях для вырабу аўтамабільных шын і па ўласцівасцях адпавядае імпартнаму аналагу. Распрацоўка садзейнічае імпартазамяшчэнню сыравіны і зніжэнню кошту гатовых вырабаў за кошт айчыннага прадукту.
• Арганічнае масла прызначана для вырабу паліровачнай алмазазмяшчальнай завісі, прызначанай для двухбаковай паліроўкі крамянёвых пласцін. Масла ўласцівасцям адпавядае імпартнаму аналагу і плануецца да выкарыстання на ААТ «Інтэграл» у Мінску.
• Сцеклонапоўненыя кампазіцыі поліпрапілена прызначаны для вырабу ліццёвых дэталяў канструкцыйнага прызначэння ў машынабудаванні, электратэхніцы, будаўніцтве і бытавой тэхніцы. На гэты момант выраблена доследна-прамысловая партыя і праводзяцца яе выпрабаванні ў прамысловых умовах.
• Вугляродныя сарбенты прызначаны для выкарыстання ў працэсах ачысткі водных і газавых асяроддзяў ад таксічных забруджванняў у якасці фільтраў для ўлоўлівання пары бензіну і іншых лёгкіх вуглевадародаў. Дазваляюць вырашыць праблему рацыянальнага выкарыстання высокасярністага нафтавага коксу, утылізацыі коксавага пылу і адыходаў ПЭТФ.
• Паліўныя брыкеты з нафтавага коксу вырашаюць праблему ўтылізацыі адходаў, скарачаюць залежнасць ад традыцыйных рэсурсаў і забяспечваюць атрыманне цеплавой энергіі. Брыкеты маюць высокую цеплыню гарэння, экалагічныя і могуць выкарыстоўвацца як альтэрнатыўнае паліва ў прамысловасці і камунальна-бытавых патрэбах, асабліва ў рэгіёнах з абмежаваным доступам да прыроднага газу.

Сярод інавацыйных распрацовак вучоных Полацкага універсітэта – праграмна-апаратны комплекс па прамысловай бяспецы з прымяненнем тэхналогій дапоўненай рэальнасці. Праект прызначаны для вывучэння структуры нафтаперапрацоўчага прадпрыемства і верагодных аварыйных сітуацый на яго асноўных устаноўках.

У макет, які прадстаўляе зменшаную копію нафтаперапрацоўчага прадпрыемства, убудавана апаратнае начынне для сімуляцыі аварыйных сітуацый. Асабліва небяспечныя эфекты – выбухі, пажары візуалізуюцца з дапамогай тэхналогій дапоўненай рэальнасці. Дзякуючы інтэграцыі мікракантролерных прылад, датчыкаў, абсталявання для светлавых і гукавых эфектаў, мабільных прылад дасягаецца эфект поўнага апускання ў працэс інтэрактыўнага навучання.

Распрацаваны шэраг інтэрактыўных праграм, якія навучаюць прымаць абгрунтаваныя рашэнні па ліквідацыі няштатных сітуацый у адпаведнасці з рэгламентамі рэагавання. Комплекс выкарыстоўваецца ў цэнтры бяспекі МНС у Наваполацку, аналагічная распрацоўка створана для прадпрыемства «Полацк-Шкловалакно».

На стэндзе прадстаўлена распрацоўка ў сферы робататэхнікі – праграмна-мабільны комплекс «Робат-павук», прызначаны для ажыццяўлення кантролю навакольнага асяроддзя. У прыватнасці, робат-павук сочыць за наяўнасцю шкодных газаў шляхам усталёўкі ў канструкцыю спецыяльных датчыкаў і распрацоўкі праграмнага забеспячэння.