Полацкі калегіум: слаўная гісторыя, вартая працы

Cёння Полацкі калегіум з'яўляецца адным з найважнейшых турыстычных аб'ектаў рэгіёна. У многім такі высокі статус ён мае дзякуючы шматгадовай рабоце турыстычнага цэнтра Полацкага дзяржаўнага ўніверсітэта імя Еўфрасінні Полацкай. З 2013 года турыстычны цэнтр ажыццяўляе экскурсійнае абслугоўванне і ўдасканальваецца ў галіне турызму, садзейнічае пашырэнню гістарычнага і культурнага кантэксту ў сферы вышэйшай адукацыі рэгіёну. У 2024 годзе колькасць экскурсантаў пераадолела адзнаку ў 20 000 і склала 26886 чалавек, 9637 з якіх замежныя грамадзяне.

Аляксандр Мікалаевіч Барысевіч, кіраўнік турыстычнага цэнтра Полацкага дзяржаўнага ўніверсітэта імя Еўфрасінні Полацкай: «У 2014 годзе, калі дзейнасць турцэнтра толькі набірала абароты, экскурсіі літаральна прапаноўваліся жадаючым ля ўваходу на тэрыторыю комплексу, таму сённяшні вынік сапраўды каштоўны. Полацкі калегіум – асаблівае месца, якое мы проста абавязаны шанаваць. Наша мэта, хутчэй нават місія, – азнаёміць як мага больш людзей з яго гісторыяй і сучаснасцю, перадаць гонар і любоў, якія адчуваем самі. Мусіць, немагчыма зрабіць нешта па-сучаснасці добра, калі гэтым не жыць.

Пра выдатныя мясціны найстарэйшай вышэйшай навучальнай установы Беларусі даўно ведаюць як у нашай краіне, так і за яе межамі, і імкнуцца іх убачыць. Напрыклад, у планінгу ўжо ёсць так званая бронь на 2026 год. Гэта дарагога каштуе і накладвае вялікую адказнасць.

Турцэнтр шчыра ўдзячны ўсім, хто ўнёс уклад у развіццё экскурсійнай дзейнасці на тэрыторыі комплексу Полацкага калегіума і садзейнічае ў яе паспяховым ажыццяўленні».

Адной з найважнейшых задач турыстычнага цэнтра з'яўляецца павышэнне прэстыжу Полацкага ўніверсітэта праз знаёмства з яго гісторыяй і традыцыямі. Рэалізацыя дадзенай ідэі адбываецца сумеснымі намаганнямі адміністрацыі і аддзелаў універсітэта, дзякуючы якім сёння можна ўбачыць такія ўнікальныя праекты, як скульптуры сярэднявечных студэнта і прафесара, Рэктарскі ўваход, музычны гадзіннік з акадэмічным шэсцем і, вядома, знакамітую рэканструкцыю вынаходкі XVIII стагоддзя «Механічная галава» Габрыэля Грубера. Усе гэтыя славутасці робяць славу ўніверсітэту і прымушаюць па-сапраўднаму ганарыцца сваёй alma mater.

Для прасоўвання калегіума як значнага турыстычнага аб'екта супрацоўнікі турыстычнага цэнтра штогод прымаюць удзел у мерапрыемствах у сферы турызму: сустрэчах, семінарах, рэспубліканскіх і міжнародных спецыялізаваных выставах, што дае магчымасць набыць каштоўныя сувязі ў турыстычнай галіне, уключыць помнік архітэктуры ў пастаянныя экскурсійныя праграмы.

У красавіку, верасні і кастрычніку 2024 года адбыліся прэзентацыі турыстычнага патэнцыялу Полацкага калегіума ў рамках рэкламна-інфармацыйных тураў для турыстычных аператараў і прадстаўнікоў СМІ Беларусі і Расіі, у тым ліку ўдзельнікаў Форума Камітэта па дзіцячым і сямейным турызме Расійскага Саюза Туріндустрыі. Акрамя таго, прадстаўнікі турыстычнага цэнтра ўніверсітэта ўваходзяць у склад Міжведамаснага экспертна-каардынацыйнага савета па пытаннях развіцця турызму пры Полацкім раённым выканаўчым камітэце.

Вынікам планамернай работы па павышэнні якасці абслугоўвання і рэалізацыі многіх ініцыятыў сталі высокія паказчыкі ў рабоце. На сённяшні дзень турцэнтр універсітэта ажыццяўляе супрацоўніцтва з больш як 100 турыстычнымі кампаніямі Беларусі і Расіі. Шматгадовымі партнёрамі ў Рэспубліцы Беларусь з'яўляюцца тураператары «Ілва», «Аўтаматызаваныя тэхналогіі турызму», «Беларыенцір», турыстычныя кампаніі «Экскурс», «Віяпаль», «Спадчына», «Вегатур», «ТурСэрвісВаяж», «Эладатур» і іншыя. У ліку пастаянных заказчыкаў таксама знаходзяцца такія тураператары Расійскай Федэрацыі, як «ТурТрансВаяж», турыстычныя кампаніі «На 7 пагорках», «Едзем», «Любы капрыз», «Казачнае падарожжа» і многія іншыя.

За час актыўнай дзейнасці турыстычны цэнтр Полацкага ўніверсітэта дабіўся высокіх вынікаў не толькі ў практычным напрамку работы, але і ў тэарэтычных аспектах. Турыстычны цэнтр мае багаты вопыт у падтрымцы і кансультацыі грамадска значных праектаў, рэалізацыі ўласных ініцыятыў, а таксама распрацоўцы метадычных дапаможнікаў. У Год гістарычнай памяці сумеснымі намаганнямі турцэнтра, аддзелаў і кафедраў універсітэта быў рэалізаваны праект «Малая Вялікая Перамога», які атрымаў шырокую агалоску і шэраг значных узнагарод. У 2023 годзе ў сценах калегіума быў створаны выставачны праект «Слаўны летапіс», які расказвае пра выпускнікоў Полацкага кадэцкага корпуса, якія зрабілі імя сабе і сваёй alma mater выключнымі дасягненнямі. Турыстычны цэнтр прыняў удзел у распрацоўцы VR-праекта «Гераічны ДАК», значнасць якога была шматкроць ацэнена на самым высокім узроўні.

Варта адзначыць, што гістарычныя будынкі ўніверсітэта з'яўляюцца прывабнымі не толькі для турыстаў, але і для сродкаў масавай інфармацыі. Цікавасць да работы ўніверсітэта і турыстычнага цэнтра з багатым мінулым рэгіёну нярэдка знаходзіцца ў цэнтры ўвагі многіх выданняў і тэлеканалаў міжнароднага, рэспубліканскага і рэгіянальнага значэнняў. Полацкі калегіум стаў «героем» шматлікіх перадач, сюжэтаў і трэвэл-шоў. Так, дзякуючы рэпартажу тэлеканала СТВ за папулярным турыстычным аб'ектам замацавалася ягоная альтэрнатыўная назва – «беларускі Хогвартс». У 2024 годзе адбыліся здымкі славутасцяў комплексу расійскім федэральным тэлеканалам «РЭН ТБ» і асветніцкім федэральным тэлеканалам «Расія Культура».

Дзякуючы якаснай працы турыстычнага цэнтра і ўвазе да мінулага як аднаму з прынцыпаў нашага ўніверсітэта Полацкі калегіум стаў адной з «візітных картак» старажытнага горада Беларусі, а для кожнага студэнта і супрацоўніка Полацкага ўніверсітэта – гонарам за годную гісторыю!