1 верасня ў Полацкім дзяржаўным універсітэце імя Еўфрасінні Полацкай пачаўся Тыдзень ведаў – урачысты старт новага навучальнага года. У гэты дзень першакурснікі атрымалі студэнцкія білеты і заліковыя кніжкі, якія сімвалізуюць пачатак іх акадэмічнага шляху, а потым наведалі святочны канцэрт.
Святочны канцэрт
З моманту заснавання Полацкі ўніверсітэт шануе свае традыцыі і звычаі, якія складваліся і ўмацоўваліся гадамі дзякуючы працы выкладчыкаў, супрацоўнікаў і пакаленняў студэнтаў. У Дзень ведаў першакурснікам удалося адчуць сябе часткай гэтай жывой гісторыі, прайшоўшы сваю першую па-сапраўднаму ўрачыстую падзею ў сценах alma mater – пасвячэнне ў студэнты.
Святочны канцэрт
На доўгачаканай цырымоніі рэктар Юрый Яцэнтавіч Раманоўскі ўручыў новым студэнтам сімвалічны ключ ведаў, які адкрывае шлях да мудрасці. Студэнт факультэта камп'ютарных навук і электронікі, пераможца абласнога этапа і фіналіст рэспубліканскага этапа конкурсу «Студэнт года-2025» Уладзіслаў Прозараў перадаў хлопцам агонь ведаў, каб святло вучэння заўсёды асвятляла іх шлях. Затым настала чарга для першакурснікаў даць клятву, абяцаючы быць адданымі свайму ўніверсітэту, імкнуцца да ведаў і любіць Беларусь. Цырымонія завяршылася выкананнем гімна ўсіх студэнтаў.
Юрый Яцэнтавіч Раманоўскі і Анастасія Мягкова (фота 1) Уладзіслаў Прозараў і Глеб Сыцэвіч (фота 2)
Юрый Яцэнтавіч Раманоўскі, рэктар Полацкага ўніверсітэта: «Дарагія першакурснікі, ведаеце, вам сёння пашанцавала заспець унікальны дзень з пункту гледжання календара – панядзелак 1 верасня. Шмат хто кажа «з панядзелка пачну новае жыццё», і ў вас ёсць рэальная магчымасць пачаць новы, вельмі яркі этап вашага жыцця менавіта сёння.
Я хачу, каб кожны з вас узяў на сябе абавязацельства: імкнуцца да вучобы на выдатна, займацца спортам і ўдзельнічаць у творчым жыцці ўніверсітэта. Запісвайцеся ў спартовыя секцыі, творчыя калектывы, не бойцеся выходзіць на сцэну – магчыма, нехта з вас, як Антон і Наталля, будзе сустракаць першакурснікаў менавіта тут у наступным годзе.
У кожным з вас скрыты вялізны патэнцыял. Наша задача – разам дапамагчы вам яго выявіць, раскрыць і рэалізаваць. Я ўпэўнены: у нас усё атрымаецца, таму што сёння вы афіцыйна становіцеся паўнапраўнымі студэнтамі вялікай сям'і Полацкага дзяржаўнага ўніверсітэта. Віншую!»
Юрий Яцентович Романовский
Канцэртная праграма працягнулася запальнымі выступамі творчых калектываў Полацкага ўніверсітэта. Першакурснікі атрымалі асалоду ад нумараў студый сучаснага танца «SJ Crew» і «ToryDance», а таксама выступленняў удзельнікаў студыі сольных спеваў «Настрой», вакальнай студыі «Inventa» і прызёраў фестывалю студэнцкай творчасці «Талент.psu.by».
Святочны канцэрт
Асаблівым падарункам для першакурснікаў стала выступленне творчага калектыву вытворчага рэспубліканскага унітарнага прадпрыемства «Віцебскаблгаз». Завяршылі святочны канцэрт танцы і караоке, да якіх далучыліся нават дэканы і рэктарат.
Святочны канцэрт
Наперадзе першакурснікаў чакае насычаны тыдзень, прысвечаны знаёмству з універсітэтам. Сардэчна запрашаем!
