У Полацкай Мастацкай галерэі адкрыўся сумесны выставачны праект «У арт-прасторы Мастацкай галерэі» студэнтаў-дызайнераў Полацкага дзяржаўнага ўніверсітэта імя Еўфрасінні Полацкай.
Адкрыццё выставачнага праекта «У арт-прасторы Мастацкай галерэі»
Гэта не першы, але вельмі яскравы праект, рэалізаваны дзякуючы сумесным намаганням Полацкага дзяржаўнага ўніверсітэта імя Еўфрасінні Полацкай і Мастацкай галерэі – філіяла Нацыянальнага Полацкага гісторыка-культурнага музея-запаведніка. Куратар і арганізатар выставы з боку ўніверсітэта – Андрэй Анатольевіч Піскун, старшы выкладчык кафедры архітэктуры і дызайну.
Андрэй Анатольевіч Піскун і студэнты-аўтары работ
У рамках дысцыпліны «Акадэмічны жывапіс» студэнты-дызайнеры выконвалі копіі жывапісных палотнаў з калекцыі Полацкай Мастацкай галерэі. Крыніцай натхнення стаў выстава «Сцянапіс XII–XIX стст. Спаса-Праабражэнскага храма» – экспазіцыя алейнага жывапісу XVIII-XIX стст., адслаеная са сцен храма пры рэстаўрацыі.
Не ў кожнага студэнта вышэйшай навучальнай установы ёсць магчымасць папрацаваць у гістарычным будынку, прасякнуцца духам часу, увабраць традыцыі мінулага праз прызму сапраўднага даўжынёю ў 300 гадоў. Студэнты-дызайнеры Полацкага ўніверсітэта дакрануліся да гістарычнай і культурнай каштоўнасці ўнікальнага помніка архітэктуры і жывапісу і правялі навучальныя заняткі ў сценах Мастацкай галерэі.
Копіі карцін, выкананыя студэнтамі
Праца працягвалася два месяцы ў памяшканні галерэі, на працягу якіх студэнты выконвалі копіі работ з жывапісных палотнаў. Капіраванне жывапісных твораў – даўні і верны спосаб навучання мастацкім метадам і прыёмам будучых спецыялістаў творчых прафесій. Гэты класічны занятак па жывапісе для ўдасканалення жывапісных навыкаў, вывучэння творчасці мастакоў.
Студэнты 1–4 курсаў спецыяльнасцей «Дызайн прадметна-прасторавага асяроддзя» і «Графічны дызайн і мультымедыядызайн» прадставілі наведвальнікам экспазіцыі мноства копій карцін. Сярод студэнтаў-удзельнікаў: Аляксандра Казырэнка, Яна Аляшкоўская, Ангеліна Гладко, Ксенія Балтрушэвіч, Лізавета Жойдзь, Кацярына Кітовіч, Дзмітрый Ільюшэнка, Кіра Лукіна, Яўгенія Іваненка, Кацярына Забела, Лізавета Федзька, Варвара Парфяновіч, Дар'я Пузікава, Анастасія Сакалова.
Копіі карцін, выкананыя студэнтамі
У праектах маладых і таленавітых людзей можна адзначыць цудоўны творчы патэнцыял, а таксама ўменне перадаць сэнсы, закладзеныя ў арыгінальных работах мастакоў.
На адкрыцці выставы з прывітальным словам выступіла Наталля Леанідаўна Анцімонава, загадчык філіяла Мастацкай галерэі. Яна падкрэсліла, што галоўным прыярытэтам для мастакоў заўсёды быў і застаецца творчы складальнік, бо зрабіць копію – гэта не проста паўтарыць манеру выканання, але і адлюстраваць адпаведную эстэтыку, створаную аўтарам карціны.
Рэктар Полацкага ўніверсітэта Юрый Яцэнтавіч Раманоўскі выказаў словы падзякі і захаплення Мастацкай галерэяй, а таксама надзею на далейшае супрацоўніцтва. Юры Яцэнтавіч падзякаваў студэнтам за добра праведзеную працу.
Наталля Леанідаўна Анцімонава, Юрый Яцэнтавіч Раманоўскі і Ірына Уладзіміраўна Бурая (фота 1) Алена Генадзеўна Крамнёва (фота 2)
Прарэктар па навуковай рабоце Ірына Уладзіміраўна Бурая акцэнтавала ўвагу на значнасці выставы «Сцянапіс XII–XIX стст. Спаса-Праабражэнскага храма» і каштоўнасці праекта для навучэнцаў.
Загадчык кафедры архітэктуры і дызайну Алена Генадзеўна Крамнёва адзначыла, што ўсе выбраныя студэнтамі жывапісныя палотны для копій маюць вялікі водгук у іх творчасці. І дадала, што будучыня кафедры з такімі творчымі і крэатыўнымі студэнтамі мае далёкасяжныя перспектывы.
Удзельнікі цырымоніі адкрыцця выставы
Кафедра архітэктуры і дызайну дзякуе загадчыку філіяла Мастацкай галерэі Наталлі Леанідаўне Анцімонавай за рэалізацыю сумеснага праекта. З экспазіцыяй у хуткім часе можна будзе азнаёміцца ў сценах нашай альма-матэр, а зараз выстава знаходзіцца ў сценах Полацкай карціннай галерэі.
