Дзень адчыненых дзвярэй 2025

На ўрачыстым адкрыцці Дня адчыненых дзвярэй рэктар Полацкага ўніверсітэта Юрый Яцэнтавіч Раманоўскі выступіў з брыфінгам, у якім распавёў пра асаблівасці ўступнай кампаніі 2026 года і прадставіў адукацыйныя праграмы факультэтаў.

Рэктар распавёў пра 5 ільготных траекторыяў паступлення, якія дазваляюць стаць студэнтам без прадастаўлення сертыфікатаў ЦТ і ЦЭ:

• Атрымаць дыплом I, II, III ступені на шматпрофільнай універсітэцкай алімпіядзе
• Атрымаць накіраванне на мэтавы набор
• Атрымаць дыплом I, II, III ступені на абласным этапе Рэспубліканскай алімпіяды школьнікаў
• Прайсці навучанне ў класе профільнай накіраванасці: інжынерны, педагагічны, спартыўна-педагагічны, ваенна-патрыятычны клас/група
• Стаць уладальнікам атэстата асаблівага ўзору з узнагароджаннем залатым або сярэбраным медалём

У Полацкім універсітэце дзейнічае аўтаматызаваная сістэма залічэння. Абітурыент удзельнічае ў конкурсе на ўсе спецыяльнасці ўнутры выбранай ім групы А. Залічэнне адбываецца наступным чынам: абітурыенты ранжыруюцца па агульнай суме набраных балаў, пры гэтым улічваюцца прыярытэты, якія яны самі расставілі для спецыяльнасцей.

Калі абітурыент не прайшоў па конкурсе на першую спецыяльнасць, ён аўтаматычна ўдзельнічае ў конкурсе на наступны накірунак са свайго спісу прыярытэтаў. Такім чынам, ва ўсіх ёсць магчымасць паступіць на іншую спецыяльнасць, калі яны не прайшлі на першую. У групе В дзейнічае раздзельны конкурс, гэта значыць абітурыенты ўдзельнічаюць у конкурсе толькі на адну са спецыяльнасцяў.

Знайсці спецыяльнасці ў групах А і В, а таксама неабходныя ўступныя іспыты можна па спасылцы. Прахадныя балы мінулых гадоў размешчаны на афіцыйным сайце ўніверсітэта ў раздзеле для абітурыентаў.

Полацкі ўніверсітэт прапануе падрыхтоўчыя курсы да цэнтралізаванага іспыту, цэнтралізаванага тэставання і ўступных іспытаў 2026. Нашы выкладчыкі маюць досвед падрыхтоўкі абітурыентаў да іспытаў з моманту запуску ЦТ у Беларусі. Дзякуючы комплекснай падрыхтоўцы вы запоўніце прабелы ў ведах, сістэматызуеце матэрыял і навучыцеся рашаць складаныя задачы. Прадугледжана магчымасць выбраць зручны для сябе фармат навучання па 11 прадметах. Падрабязная інфармацыя і кантакты даступныя па спасылцы.

Дзень адчыненых дзвярэй працягнулі інфа-сесіі з афіцыйнымі прадстаўнікамі факультэтаў. Абітурыенты атрымалі вычарпальную інфармацыю пра кожны напрамак навучання, спецыфіку навучальнага працэсу і магчымасці, якія дае кожная спецыяльнасць, уключаючы даследчыя праекты, міжнародныя стажыроўкі і працаўладкаванне выпускнікоў.

На інтэрактыўных пляцоўках школьнікі пагутарылі з выкладчыкамі, прымерылі на сябе ролю студэнтаў розных спецыяльнасцей, пазнаёміліся з тэхналогіямі і абсталяваннем, якое прымяняецца ў навучанні і прынялі ўдзел у займальных майстар-класах.

Прадстаўнікі арганізацый-заказчыкаў кадраў расказалі абітурыентам пра перспектывы мэтавай падрыхтоўкі спецыялістаў. Навучэнцы школ атрымалі каштоўную інфармацыю пра магчымасці пабудовы кар'еры ў абранай імі вобласці, а таксама пра тое, як мэтавая падрыхтоўка можа дапамагчы ім паспяхова пачаць прафесійную дзейнасць пасля заканчэння навучання.

Супрацоўнікі Полацкага ўніверсітэта прадставілі абітурыентам дадатковыя магчымасці для прафесійнага развіцця:

• Цэнтр вывучэння замежных моў, у якім можна вывучыць англійскую, нямецкую, французскую і кітайскую мовы з любога пачатковага ўзроўню, нават А0, па зручным графіку заняткаў. Навучанне праходзіць індывідуальна ці ў малых/сярэдніх/вялікіх групах на Полацкай і Наваполацкай пляцоўцы.
• Цэнтр стартапаў і прадпрымальніцкіх ініцыятыў «Startup Live» падтрымлівае маладыя таленты ў рэалізацыі бізнэс-ідэй. Тут студэнты вывучаюць метадычныя асновы складання бізнес-плана, фарміраванне іміджу, тэхніку В2В продажаў, падатковую сістэму ў рамках ствараемага праекта, а таксама юрыдычную і маркетынгавую асновы.
• Ваенная кафедра дазваляе паралельна з грамадзянскай спецыяльнасцю асвоіць ваенны напрамак і да канца навучання атрымаць першае воінскае афіцэрскае званне – «лейтэнант запасу».

Абітурыенты падзяліліся ўражаннямі:

Вікторыя Вілім: «Я планую паступаць на інжынерна-будаўнічы факультэт, каб стаць дызайнерам прадметна-прасторавага асяроддзя. Мяне вельмі прываблівае творчая дзейнасць. Я люблю маляваць і хацела б працягваць займацца гэтым у будучыні. Я паспела наведаць некалькі пляцовак і была на цудоўным канцэрце. Асабліва мне спадабалася выступленне калектыву «ToryDance».

Дар'я Пярвёнак: «Я планую паступаць на юрыдычны факультэт, спецыяльнасць «Мытная справа». Канцэрт мне вельмі спадабаўся, было цікава, і я даведалася шмат карыснай інфармацыі пра ўступную кампанію і сам універсітэт».

Мацвей Беларусаў: «Уражанні ад універсітэта толькі станоўчыя. Больш за ўсё мяне зацікавіў факультэт інфармацыйных тэхналогій, думаю стаць праграмістам-распрацоўшчыкам».

Ягор Петрачук: «Мне вельмі спадабаўся выступ рэктара і ўзняў настрой. Сёння я даведаўся шмат новага пра Полацкі ўніверсітэт, і цяпер думаю пра тое, каб паступіць сюды пасля 11 класа».