Дзень адчыненых дзвярэй «АR_FEST»

Ва ўтульнай Welcomе-zonе госці прайшлі рэгістрацыю, пагутарылі з прадстаўнікамі ўніверсітэта, атрымалі інфармацыйныя буклеты і задалі пытанні пра праграму дня.

На ўрачыстым адкрыцці дня адчыненых дзвярэй рэктар Полацкага ўніверсітэта Юрый Яцэнтавіч Раманоўскі выступіў з брыфінгам, у якім расказаў пра асаблівасці ўступнай кампаніі 2025 года. Ён падкрэсліў важнасць усвядомленага выбару прафесіі і абазначыў магчымасці, якія дае наш універсітэт. Пасля афіцыйнай часткі госці нацешыліся канцэртнай праграмай, падрыхтаванай студэнтамі.

Юрый Яцэнтавіч Раманоўскі, рэктар Полацкага ўніверсітэта: «Сёння ўніверсітэт – гэта 7 факультэтаў, 23 кафедры, 36 спецыяльнасцяў, 48 філіялаў кафедр і 32 інжынерныя класы. У 2025 годзе мы плануем набіраць студэнтаў на 28 спецыяльнасцей з 36. Усе яны размеркаваны на дзве вялікія групы: А, дзе прадстаўлена 21 спецыяльнасць і Б, дзе прадстаўлены 7 спецыяльнасцей. З факультэтамі ўніверсітэта вы зможаце пазнаёміцца сёння на інтэрактыўных пляцоўках. Кожны з іх мае свой стыль і з'яўляецца дружнай сям'ёй, да якой вы зможаце далучыцца».

Кацярына Ігараўна Галяшова, прарэктар па вучэбнай працы: «У гэтым годзе мы вырашылі правесці дзень адчыненых дзвярэй увосень, напярэдадні папярэдняга этапу шматпрофільнай універсітэцкай алімпіяды, каб праінфармаваць абітурыентаў аб магчымасці льготнай траекторыі паступлення ў наш універсітэт. Мерапрыемства апраўдала і нават перасягнула нашы чаканні. Па-першае, зарэгістравалася каля 600 чалавек, а прыйшло значна больш, і гэта, не лічачы бацькоў і педагогаў, якія суправаджалі абітурыентаў. Такім чынам у мерапрыемстве прынялі ўдзел больш за 1000 чалавек.

Традыцыйна наш дзень адчыненых дзвярэй дзеліцца на два блокі. Першы блок – інтэрактыўны, дзе мы дэманструем магчымасці ўніверсітэта, спецыфіку і асаблівасці нашых спецыяльнасцяў і факультэтаў. Другі блок – інфармацыйныя сустрэчы з дэканамі факультэтаў, на якіх кожны дэкан падрабязна расказвае пра свой факультэт і спецыяльнасці, а таксама адказвае на пытанні абітурыентаў і іх бацькоў. Асаблівасцю сённяшняга дня адчыненых дзвярэй стала абнаўленне тэматычных пляцовак, напоўненых навуковымі праектамі нашых студэнтаў, якія сталі прызёрамі на абласным, рэспубліканскім і міжнародным узроўнях».

У Полацкім дзяржаўным універсітэце імя Еўфрасінні Полацкай дзейнічаюць 5 ільготных траекторый паступлення, якія дазваляюць стаць студэнтам без прадастаўлення сертыфікатаў ЦТ і ЦЭ:

• Атрымаць дыплом I, II, III ступені на шматпрофільнай універсітэцкай алімпіядзе
• Атрымаць накіраванне на мэтавы набор
• Атрымаць дыплом I, II, III ступені на абласным этапе Рэспубліканскай алімпіяды школьнікаў
• Прайсці навучанне ў класе профільнай накіраванасці: інжынерны, педагагічны, спартыўна-педагагічны, ваенна-патрыятычны клас/група
• Стаць уладальнікам атэстата асаблівага ўзору з узнагароджаннем залатым або сярэбраным медалём

У нашым універсітэце дзейнічае аўтаматызаваная сістэма залічэння. Абітурыент удзельнічае ў конкурсе на ўсе спецыяльнасці ўнутры выбранай ім групы А. Залічэнне адбываецца наступным чынам: абітурыенты ранжыруюцца па агульнай суме набраных балаў, пры гэтым улічваюцца прыярытэты, якія яны самі расставілі для спецыяльнасцей.

Калі абітурыент не прайшоў па конкурсе на першую спецыяльнасць, ён аўтаматычна ўдзельнічае ў конкурсе на наступны накірунак са свайго спісу прыярытэтаў. Такім чынам, усе маюць магчымасць паступіць на іншую спецыяльнасць, калі не прайшлі на першую. У групе В дзейнічае раздзельны конкурс, гэта значыць абітурыенты ўдзельнічаюць у конкурсе толькі на адну са спецыяльнасцяў.

Знайсці спецыяльнасці 2025 у групах А і В, а таксама неабходныя ўступныя іспыты вы можаце ў буклеце.

На Info-сесіях абітурыенты атрымалі вычарпальную інфармацыю пра кожны напрамак навучання ад афіцыйных прадстаўнікоў факультэтаў. Дэканы і выкладчыкі падрабязна расказалі пра курсы, метады навучання і магчымасці стажыровак, а таксама адказалі на пытанні пра перспектывы працаўладкавання пасля заканчэння вучобы.

На працягу ўсяго мерапрыемства абітурыенты маглі прайсці CareerTest, каб праверыць свае прафесійныя здольнасці. Так абітурыентам удалося лепш зразумець свае інтарэсы і схільнасці, што, безумоўна, дапаможа ў выбары будучай прафесіі.

На пляцоўцы прыёмнай камісіі абітурыенты атрымалі кансультацыі па пытаннях паступлення. Спецыялісты расказалі пра неабходныя дакументы, тэрміны падачы заяў і асаблівасці ўступных іспытаў.

Кожнаму факультэту Полацкага ўніверсітэта былі прысвечаны інтэрактыўныя пляцоўкі з майстар-класамі і інфармацыйнымі матэрыяламі. У фармаце жывых зносін студэнты і выкладчыкі падзяліліся асабістым вопытам, расказалі аб працэсе навучання і праектах, а таксама прадставілі кожную спецыяльнасць. Практычныя заданні зрабілі знаёмства з факультэтамі больш захапляльным.

У Opportunity Zone абітурыенты ўбачылі асноўны спектр прапанаваных паслуг і рэсурсаў, якія дапамогуць ім у вучобе і будучым працаўладкаванні. Супрацоўнікі ўніверсітэта прадставілі:

• Цэнтр вывучэння замежных моў, у якім можна вывучыць англійскую, нямецкую, французскую і кітайскую мовы з любога пачатковага ўзроўню, нават А0, па зручным графіку заняткаў. Навучанне праходзіць індывідуальна ці ў малых/сярэдніх/вялікіх групах на Полацкай і Наваполацкай пляцоўцы.
• Цэнтр стартапаў і прадпрымальніцкіх ініцыятыў «Startup Live» падтрымлівае маладыя таленты ў рэалізацыі бізнес-ідэй. Тут студэнты вывучаюць метадычныя асновы складання бізнес-плана, фарміраванне іміджу, тэхніку В2В продажаў, падатковую сістэму ў рамках ствараемага праекта, а таксама юрыдычную і маркетынгавую асновы.
• Ваенная кафедра дазваляе паралельна з грамадзянскай спецыяльнасцю асвоіць ваенны напрамак і да канца навучання атрымаць першае воінскае афіцэрскае званне – «лейтэнант запасу».

Абітурыенты падзяліліся ўражаннямі пра Дзень адчыненых дзвярэй:

Марыя Зайцава: «Студэнты і выкладчыкі вельмі ветлівыя, адказваюць на ўсе пытанні, якія нас цікавяць. Нам вельмі падрабязна растлумачылі пра працэс сёлетняга паступлення і прыёмную кампанію. Указалі ўсе даты, прадметы, спецыяльнасці, факультэты. Таксама спадабаліся творчыя нумары ўніверсітэта, вельмі яркія і дынамічныя».

Максім Данцоў: «Атмасфера ва ўніверсітэце вельмі прыязная. Тут вельмі шмат людзей, усе вельмі ўсмешлівыя, з энтузіязмам расказваюць пра свае факультэты. Я схадзіў на Info-сесію юрыдычнага факультэта, мне вельмі спадабалася іх інтэрактыўная пляцоўка. Я разглядаю «Правазнаўства» як адзін з варыянтаў для паступлення».

Крысціна Лісоўская: «Мне вельмі падабаецца ўніверсітэт, тут вельмі прыязная, сямейная атмасфера. Больш за ўсё запомнілася пляцоўка спецыяльнасці «Эканамічная бяспека», сама спецыяльнасць мне таксама вельмі спадабалася. Таксама вельмі цікавай была пляцоўка спецыяльнасці «Гісторыя».

Віталіна Мясаедава: «На Дні адчыненых дзвярэй прадстаўлены розныя інтэрактыўныя пляцоўкі, дзе можна даведацца шмат новай і карыснай інфармацыі. Больш за ўсё мне спадабаліся пляцоўкі фінансава-эканамічнага і юрыдычнага факультэтаў».