Агульныя звесткi

Фальклорны гурт «Варган»

Фальклорны гурт «Варган» быў створаны на базе гісторыка-філалагічнага факультэта Полацкага дзяржаўнага ўніверсітэта ў 2011 г. Аснову рэпертуара гурта складаюць беларускія традыцыйныя песні розных жанраў – каляндарныя, сямейна-абрадавыя, лірычныя. Гурт выконвае песні з розных гісторыка-культурных рэгіёнаў Беларусі. Асаблівае месца ў рэпертуары гурта займае спеўны матэрыял з Беларускага Падзвіння, запісаны ўдзельнікамі гурта падчас этнаграфічных экспедыцый.

З моманту свайго стварэння «Варган» прымае актыўны ўдзел у культурных мерапрыемствах Полацкага дзяржаўнага ўніверсітэта. Традыцыйным стала калядаванне на гуманітарным факультэце, правядзенне святаў «Масленіца» і «Гуканне вясны».

Калектыў актыўна супрацоўнічае з полацкім Музеем традыцыйнага ручнога ткацтва Паазер’я. Штогод на базе музея праводзяцца святы, прысвечаныя «Калядам», «Гуканню вясны», беларускаму вясельнаму абраду.

Зараз »Варган» з’яўляецца сапраўднай творчай лабараторыяй па вывучэнні і перайманні традыцыйнай беларускай культуры. На базе гісторыка-філалагічнага факультэта праводзяцца штотыднёвыя рэпетыцыі, арганізуюцца майстар-класы па традыцыйных беларускіх танцах, адбываюцца творчыя сустрэчы з цікавымі людзьмі і творчымі калектывамі з Беларусі і замежжа.

Усіх, хто хоча навучыцца традыцыйным беларускім спевам і танцам, запрашаем на нашы сустрэчы:

спеўныя рэпетыцыі адбываюцца кожны чацвер у аўдыторыі 310 корпуса «А» ПДУ (Полацк), пачатак ў 17 гадзін.
заняткі па традыцыйных танцах праводзяцца па суботах у дыска-зале спартыўнага корпуса ПДУ (Полацк).

Сачыце за абвесткамі ў нашай суполцы Вконтакте «Традыцыйныя танцы ў Полацку»

Емяльянчык
Вольга Антонаўна

Мастацкі кіраўнік,
дацэнт кафедры гісторыі і сацыягуманітарных навук

Вконтакте: https://vk.com/hurt_varhan

Адрас: вул. Стралецкая, 4
211400, г. Полацк
Вицебская вобл., Беларусь

Выкананыя песні

Мерапрыемства

З восені 2014 года удзельніцы «Варгана» Ганна Лутава і Ксенія Глот праводзяць майстар-класы па традыцыйных танцах, на якія запрашаюцца ўсе жадаючыя. Дзяўчаты паказваюць беларускія танцы з розных куткоў Беларусі, у тым ліку і з Полацкага раёна. На танцах гучыць жывая музыка – скрыпка, бубен, баян, акардэон.

Музыкі гурта «Варган» (фота 1)

Майстар-клас па танцах (фота 2)

У верасні «Варган» удзельнічаў у VI Міжнародным фолк-фестывалі «Камяніца 2015», які праводзіцца пад адкрытым небам ў Музеі народнай архітэктуры і побыту пад Мінскам. На мерапрыемстве таксама выступалі такія вядомыя беларускія калектывы, як «Стары Ольса», «Альтанка», «Ягорава гара», «Znich», а таксама госці з замежжа – фолк-гурты «Trad Attack!» (Эстонія) і «Dzikie Jabłka» (Польшча).

«Варган» прадстаўляе беларускую культуру і на замежных фестывалях. У красавіку 2015 г. фальклорны гурт прымаў удзел у III Міжнародным фэстывалі студэнцкай творчасці «Адкрытая нацыя», арганізаваным Маскоўскім дзяржаўным абласным гуманітарным інстытутам (г. Арэхава-Зуева, Расійская Федэрацыя). У кастрычніку 2015г. у складзе полацкай дэлегацыі калектыў выступіў на V Міжнародным фестывалі народнай культуры «Беларускі кірмаш у Даўгаўпілсе» (г. Даўгаўпілс, Латвійская Рэспубліка).